ՀՀ Կառավարությունն օրերս հավանություն տվեց 2019թ․ հուլիսի 1-ից էլեկտրական շարժիչով ավտոմեքենաների և մոտոցիկլետների (ոչ հիբրիդային) ներկրումն ԱԱՀ վճարումից ազատելու վերաբերյալ օրենքի նախագծին: Արտոնությունը գործելու է մինչև 2022թ-ի հուլիսի 1-ը և այն տրանսպորտային միջոցների վրա, որոնք ներմուծման հաջորդող օրվանից 1 տարվա ընթացքում չեն արտահանվի, այդ թվում՝ ԵԱՏՄ երկրներ:
Նախագծի հիմնավորման մեջ նշվում է, որ Հայաստանում հիբրիդային և էլեկտրականությամբ սնուցվող շարժիչներով աշխատող ավտոտրանսպորտային միջոցների համար բնապահպանական հարկի գծով սահմանված է արտոնություն: Ընդունման անհրաժեշտությունը պայմանավորված է օդի աղտոտվածության նվազեցմանն ուղղված տրանսպորտային միջոցների կիրառումը խթանելու հետ։
Էլեկտրամոբիլների տարածումն աշխարհում արագ տեմպերով առաջ է գնում․ դա պայմանավորված է ոչ այնքան առաջարկների բազմազանությամբ, այլև տարբեր պետական արտոնությունների և էկոլոգիական համեմատական անվտանգության հետ։ ԱԱՀ-ի գծով արտոնությունները կիրառվում են եվրոպական բազմաթիվ երկրներում։ Շատ երկրներում դա խթանման միակ միջոցն է, կամ էլ կիրառվում է ձեռքբերման սուբսիդավորման հետ զուգահեռ։ Ի դեպ, ԱԱՀ արտոնության տրամադրումն ամենաարդյունավետն է․ նման արտոնություն կիրառող երկրները առաջատարներն են էլեկտրամոբիլների տեսակարար կշռով:
ՀՀ կառավարությունը հայտարարել է, որ այս տարի կստեղծվի էլեկտրական մեքենաների լիցքավորման կայանների ցանց՝ 23 լիցքավորման կայանով, որոնք հասանելի կլինեն Հայաստանի ողջ տարածքում:
