Հերթական խնդիրը գազով աշխատող ավտոտերերի համար. արդեն 10 օր է, ինչ Ռուսաստանից Հայաստան հեղուկ գազ չի ներմուծվում: Պատճառը Ստեփանծմինդա-Լարս ավտոճանապարհի փակ լինելն է։ Հեղուկ գազ ներմուծող ընկերությունները ևս հայտնվել են խնդրի առջև։ Այս պահին ռուս-վրացական սահմանին շուրջ 450 բեռնատար ավտոմեքենա է կանգնած, դրանց թվում են նաև հեղուկ գազով բեռնված մեքենաները։
ԱԳԼՃԿ սեփականտերերը նշում են, որ պահեստներում առկա գազը գրեթե ամբողջությամբ սպառվել է, ինչ արդյունքում հեղուկ գազի լիցքավորման մի շարք կետերում աշխատանքը դադարեցված է։ Ի դեպ, այս խնդիրն ամեն տարի ձմռանն ընդառաջ թակում է Հայաստանի դուռը, դեռ ձյան տեղումներ չկան, իսկ վիճակն արդեն լրջացել է՝ ընկերությունները մեծ չափի վնասներ և կորուստներ ունեն:
Նմանատիպ ռիսկերից ապահովագրվելու և մեծ քանակությամբ գազ պահեստավորելու համար հսկայան գումարներ են անհրաժեշտ Բացի Ռուսաստանից, Հայաստանը հեղուկ գազ ներմուծում է նաև Իրաքից, սակայն ռուսական հեղուկ գազը տարբերվում է իր որակական հատկանիշներով: Որոշ ընկերություններ երբեմն նաև Իրաքից են վառելիք բերում, սակայն գազի փոփոխության պատճառով հեղուկ գազի լիցքավորման սարքավորումները կարող են խափանվել:
Պետք է նշել, որ հեղուկ գազի դեֆիցիտի արդյունքում արդեն իսկ նկատելի գնաճ է գրանցվել. որոշ գազալցակայաններում հեղուկ գազի 1 լիտրն արժե 225 դրամ, մինչդեռ տարեսկզբին գինը կազմում էր 180 դրամ։
