ՀՀ կառավարության նոր որոշման համաձայն՝ մեքենաների լիցքավորման համար վաճառվող սեղմված գազն այսուհետ հարկվելու է ոչ թե ծավալով, այլ կշռով:
Այժմ գործող օրենքով 1000 խ/մ համար ակցիզային հարկը 25 հազար դրամ է: Նոր կարգով առաջարկվում է հարկը դարձնել 1 տոննայի համար 34 հազար դրամ: Կառավարության պնդմամբ, սա վարորդների համար լրացուցիչ հարկային բեռ չէ: Հիմնավորումն էլ հետևյալն է, եթե 1450 խ/մ-ն 1 տոննա է, ապա ակցիզային հարկը տեսականորեն չպիտի բարձրանա։
Մասնագետները ևս հիմնականում այդ կարծիքին են։ Մասնավորապես «Գազ Ֆորեվեր Լիլիան Գրուպ» ՍՊԸ տնօրեն Արտակ Բարսեղյանի դիտարկմամբ, եթե գազալցակայանների տերերը զսպեն իրենց ախորժակը, գազի թանկացում բնավ չի լինի, քանի որ, ենթադրվում է, որ կառավարությունը գազի ծավալից քաշի անցման որոշումը կատարել է իրական հաշվարկների հիման վրա։ Ամեն դեպքում, ըստ Արտակ Բարսեղյանի, որոշումը ի օգուտ վարորդների է։
Տեղեկացնենք, որ օրենքը ուժի մեջ կմտնի ապրիլի 1-ից: Սակայն գազալիցքավորման աշտարակներում դեռ պետք է կատարվեն համակարգի աշխատանքի փոփոխություններ:
